Kryetari i Zveçanit, Ilir Peci pas tensione prej 2 ditëve në veri të Kosovës ka deklaruar se nuk ka pasur asnjë propozim nga Ambasada Amerikane që të mos dalin në punë.
Peci shtoi se ditën e sotme punën e tij e ka kryer nga zyra për komunitete në fshatin Lipë të Zveçanit. Ai gjithashtu tha për Kosova Press se do të rikthehet në zyrën e kryetarit pasi që gjendja të stabilizohet.
“Nuk kemi pasur kësi lloj propozimi nga ambasada amerikane. Prej ambasadës kemi pasur propozim vetëm mos me u shkaktua ndonjë ekses, jo mos me u lajmërua (në objektet e komunës). Sot kemi vazhduar në Zyrën e Komuniteteve në fshatin Lipë në Komunën e Zveçanit, por jo në zyrën e kryetarit në objekt të komunës”, deklaroi Peci.
Ditën e djeshme Peci dhe kryetari i Zubin Potokut, Izmir Zeqiri kanë takuar ambasadorin amerikan, Jeffrey Hovenier pak pasi tensionet filluan në veri të Kosovës.