Një tjetër makinë e Policisë së Kosovës është sulmuar nga persona të maskuar në Zveçan.
Gazetarja e medias kosovare T7 ka raportuar se persona të maskuar kanë gjuajtur me gurë makinën e policisë teksa kanë vrapuar duke ndjekur automjetin.
Policia e Kosovës e ka konfirmuar se sot është dëmtuar edhe një automjet i tyre në Zveçan.
Sipas Policisë, sulmi ka ndodhur rreth orës 14:00, derisa njësia policore ka qenë duke patrulluar afër objektit të komunës në Zveçan.
Sulmi dyshohet të jetë kryer nga një grup i personave, të cilët kanë gjuajtur me mjete të forta.
Nuk ka raportime për të lënduar ndërsa Policia ka thënë se rasti është duke u hetuar.
