Sërish protestë. Studentët e mjekësisë kanë zhvilluar edhe sot tubimin para rektoratit të UMT-së dhe më pas u nisën drejt ministrisë së Arsimit pasi refuzojnë punësimin me detyrim. Studentët kundërshtojnë këtë vendim si edhe penalizimet financiare që vijnë me të. Shprehen se kanë mbështetjen e pedagogëve sa i takon kësaj çështjeje.
Sipas vendimit të ri që pritet që të miratohet nga qeveria, para nisjes së studimeve, studentët e mjekësisë duhet të firmosin kontratë për të punuar të paktën 3 vite në atdhe, pas përfundimit të studimeve duke i mbajtur peng diplomën, ose në të kundërt do paguajnë tarifën vjetore të shkollimit, me koston reale, gati 5 mijë euro në vit.
Aktualisht paguajnë 45 mijë lekë në vit tarifën. Nisma erdhi për shkak të largimit të mjekëve drejt Gjermanisë dhe vendeve të tjera.
