Dy ministrat e Brendshëm, të Shqipërisë dhe Kosovës Taulant Balla dhe Xhelal Sveçla kanë vizituar të hënën pikën e përbashkët të kalimit kufitar në Morinë, ku folën për problemin e pritjes me të cilin ballafaqohen mërgimtarët gjatë udhëtimit të tyre për në Kosovë.
Balla u pyet lidhur me anulimin e mbledhjes së të dy qeverive, për të cilën nuk ka dashur të komentojë, duke thënë se ka kohë për të folur për problemet tjera që nuk lidhen me çështjen e vizitës të së hënës.
Ministri shqiptar i Punëve të Brendshme ka thënë se sikurse ai, edhe homologu i tij nga Kosova, duhet t’i zbatojnë marrëveshjet për të cilat janë dakorduar kryeministrat e dy vendeve.
“Mërgimtarët atje po presin për ne që ta zgjidhim këtë çështje dhe unë mendoj se do ta gjejmë zgjidhjen. Sa për çështjet tjera, kemi kohë të flasim dhe ajo që u takon dy ministrave është të zbatojnë marrëveshjet të cilat kryeministrat janë dakorduar”, ka thënë ai.
Për këtë çështje shkurtimisht ka folur edhe Sveçla, i cili ka thënë se ka opinion, mirëpo do ta adresojë në një rast tjetër. “Është hera e dytë që jam këtu për disa ditë. Kam shumë opinion për këtë çështje që do të adresojmë në një rast tjetër”, është shprehur ai.
