Presidenti i Dhomës Amerikane të Tregtisë, Enio Jaço ka reaguar në lidhje me raportin e publikuar ditën e djeshme nga DASH për investimet e huaja në Shqipëri ku u theksua se vendi ynë është një vend i vështirë për biznes.
Në reagimin e tij Jaço u shpreh se Shqipëria ka potenciale për investime të huaja dhe se raporti konfirmon shqetësimet që ka pasur edhe më herët komuniteti i biznesit në vend.
“Një nga çështjet kryesore që përballet me komunitetin e biznesit por dhe me kombin, është përhapja e korrupsionit dhe krimit të organizuar, veçanërisht trafikimi i drogës, i cili ka thyer konkurrencën e drejtë në treg.
Për më tej, korrupsioni i përhapur me prokurimin publik është bërë normalitet, duke çuar në pengimin dhe largimin e investitoreve serioze.
Indeksi global i renditjes së korrupsionit nga Transparency International pikturon një trend akoma më shqetësues.
Ndërsa vendet kandidate për t’u anëtarësuar në BE, kanë tendencë përmirësimi, Shqipëria ka rënë 18 vende nga pozicioni i saj fillestar i 83-të në 2016, ndërsa ndodhet sot në vendin e 101 në renditjen globale.
Barazia ekstreme e përkeqësuar nga korrupsioni i përhapur dhe pastrimi i parave, po i shton sfidat e popullsisë, duke rezultuar në emigrim masiv, problem demografike dhe mungesë të forcës punonjëse,” u shpreh Jaço.
Ai më tej shtoi se këto problematika janë vënë në pah edhe më parë por sipas tij situata deri në 2023 vetëm është përkeqësuar.
“Por deri në vitin 2023, situata vetëm është përkeqësuar, duke lënë komunitetin e biznesit thellësisht të frustruar. Një deklaratë e përbashkët më herët këtë vit, e AmCham në partneritet mes dhomave Gjermane, Franceze dhe Italiane të biznesit ka bërë edhe njëherë thirrje për urgjencën e fillimit sa më shpejt të reformës,” thuhet më tej në reagimin e tij.
