Kryeministri i Kosovës Albin Kurti, ka thënë të shtunën se zbatimi i ligjit kundër biznesmenëve që e shkelin atë për përftime financiare, nuk nënkupton sulm ndaj lirisë së mediave.
Përmes një postimi në Twitter, Kurti ka thënë se liria e mediave është jetike dhe sulmi ndaj tyre përbën sulm ndaj demokracisë.
Kosova has 468 registered businesses whose primary activity is media & 114 licensed audio or audiovisual companies. Following registration rules is a legal duty, not a “technicality.” And enforcing such rules against a single violator does nothing to threaten media pluralism.
— Albin Kurti (@albinkurti) July 29, 2023
Reagimi i tij ka ardhur një ditë pasi Ministria e Industrisë, Ndërmarrësisë dhe Tregtisë e ka konfirmuar pezullimin e licencës së biznesit të televizionit Klan Kosova.
“Kosova i ka 468 biznese të regjistruara, aktiviteti kryesor i të cilave është media, dhe 114 kompani të licencuara audio-vizuele. Zbatimi i rregullave të regjistrimit është detyrë ligjore, ‘jo teknikalitet’. Dhe zbatimi i rregullave të tilla kundër një shkelësi të vetëm nuk e kërcënon pluralizmin medial”.
Kurti ka thënë se në vendet demokratike, institucionet e autorizuara për të trajtuar këto raste nuk janë pjesë e Zyrës së Kryeministrit, por ato kanë përkrahjen e plotë të ekzekutivit.
Më 14 qershor Ministria e Industrisë, Ndërmarrësisë dhe Tregtisë në Kosovë ka ngritur kallëzim penal ndaj medias Klan Kosova.
Kallëzimi penal është ngritur me “pretendimin se në certifikatën e biznesit, te ndërrimi i pronarëve, figuron Pejë-Serbia dhe Gjakovë-Serbia”.
Pas kësaj, Agjencia Kosovare për Regjistrimin e Bizneseve, ARBK, e ka anuluar certifikatën e biznesit të Klan Kosovës, por më 21 qershor, ajo e shfuqizuar vendimin e marrë.
Më pas, një ditë më vonë, ARBK-ja e ka anuluar edhe vendimin e 21 qershorit.
Klan Kosova ka thënë pas vendimit të 28 korrikut se, “në asnjë rrethanë nuk do ta pranojë një qasje të tillë autoritare” nga institucionet e shtetit dhe se çështjen do ta dërgojë në gjykatë. /REL
Artikulli i plotë këtu.
