Policia e Kosovës ka njoftuar përmes një postimi në Facebook se ka nisur patrullimin e përbashkët me Policinë e Shtetit shqiptar në kuadër të sezonit turistik.
Sipas këtij njoftimi, qëllim është parandalimi i aksidenteve dhe rritja e sigurisë në trafikun rrugor.
Në njoftim shkruhet se Policia e Kosovës dhe Policia e Shtetit Shqiptar kanë hartuar memorandum bashkëpunimi për patrullime të përbashkëta të dy policive rrugore në territorin e Republikës së Shqipërisë.
“Referuar numrit të shtetasve nga Kosova që shkojnë për pushime në Shqipëri dhe numrit të madh të mjeteve që qarkullojnë në akset rrugore në mes të dy vendeve, është vlerësuar i suksesshëm ky patrullim i përbashkët,” shkruan Policia e Kosovës.
