Reagimi i Kievit në 24 orët e fundit ndaj deklaratave të pretenduara të bëra nga një zyrtar i NATO-s gjatë një diskutimi në Bruksel të martën në mëngjes, në lidhje me perspektivën e anëtarësimit të Ukrainës në Aleancë, ka qenë intensiv.
Duke folur në një panel me ekspertë dhe akademikë të tjerë, Stian Jensen, kreu i zyrës së Jens Stoltenberg tha në mënyrë të qartë se “një zgjidhje mund të ishte që Ukraina të lëshojë territorin dhe të marrë anëtarësimin në NATO në këmbim”, duke sqaruar megjithatë se “Kiev është ai, i cili duhet të vendosë kur dhe me çfarë kushtesh dëshiron të negociojë”.
Shumë po pyesin pse Jensen, i konsideruar si “krahu i djathtë” i Sekretarit të Përgjithshëm të NATOs zgjodhi këtë moment të veçantë për të folur publikisht për një çështje për të cilën vetë Stoltenberg shmanget të flasë, madje duke iu referuar një “propozimi” që Kievi e ka bërë të qartë shumë herë në të kaluarën se nuk do ta merrte në konsideratë në asnjë rrethanë.
Gjatë të njëjtit diskutim, Jensen tha më tej se si do të jetë gjendja e sigurisë në Ukrainë pas përfundimit të luftës duhet të shqyrtohet dhe diskutohet. I pyetur nga një gazetar i gazetës norvegjeze Verdens Gang nëse ishte pikëpamja e NATO-s që Ukraina duhet t’i lëshonte territorin Rusisë për të arritur paqen dhe për t’u bërë anëtare e Aleancës, zyrtari vuri në dukje se diskutimi për regjimin e pasluftës tashmë është duke u zhvilluar dhe se çështja e dhënies së territoreve Rusisë tashmë është ngritur nga të tjerët.
Kievi reagoi menjëherë ndaj deklaratave të zyrtarit të NATO-s, duke i quajtur ato “absolutisht të papranueshme”. Në postimin e tij në rrjetet sociale, përfaqësuesi i Ministrisë së Punëve të Jashtme të Ukrainës, Oleg Nikolenko, theksoi se “pjesëmarrja e vetëdijshme ose e pavetëdijshme e zyrtarëve të NATO-s në formësimin e narrativës për një lëshim të mundshëm nga Ukraina të një pjese të territoreve të saj” në fakt favorizon Rusinë.
“Ukraina nuk tregton territor” shkroi Nikolenko në postimin e tij, duke shtuar se është në interes të sigurisë euroatlantike të diskutohen mënyrat për të përshpejtuar fitoren e Ukrainës dhe anëtarësimin në status të plotë në NATO.
Më parë, Mihailos Podoliak , këshilltari i Volodymyr Zelensky, kritikoi “propozimin” e Jensen me deklaratën e tij, duke e quajtur atë qesharake dhe një “zgjedhje të qëllimshme për të mposhtur demokracinë”.
I pyetur nga gazeta Verdens Gang për të komentuar deklaratat e Jensen, analisti Jakub M. Gozimirski i Institutit Norvegjez të Marrëdhënieve Ndërkombëtare (NUPI) thekson se ky qëndrim mund të jetë një shenjë e një “ndryshimi të të menduarit” nga zyrtarët për çështjen e luftës në Ukrainë. Ai e konsideron shumë të arsyeshme që ka pasur reagime.
“Kam folur mjaft me Jensen, si në takime publike ashtu edhe private. Ai është një njeri që peshon fjalët e tij. Është e qartë se gjithnjë e më shumë njerëz po mendojnë këto lloj mendimesh sepse po përpiqen të gjejnë mënyra për t’i dhënë fund luftës: a është e mundur që Ukraina t’i arrijë qëllimet e saj dhe cili do të jetë çmimi për vendin dhe Perëndimin?“, vëren Gozimirski.
Analisti thekson se deklarata e Jensen pati ndikim jo vetëm në Ukrainë, por edhe në Rusi. “Në Moskë, kjo deklaratë i lumturoi pak. Sepse personi që e bëri këtë nuk ishte një person i rastësishëm”. Sipas Gozimirskit, “ideja” që zyrtari përmendi në diskutim shkaktoi bujë sepse ishte një qëndrim publik , i cili nga disa mund të interpretohet si ndryshim në mënyrën e të menduarit të Aleancës.
