Policia e Durrësit ka identifikuar dhe ka gjobitur drejtuesin e një automjeti, i cili lëvizte në trotuar.
Reagimi ka ardhur pas publikimit të videos në të cilën makina shfaqej duke qarkulluar në pjesën e dedikuar këmbësorëve.
“Menjëherë pas publikimit të videos, shërbimet e Sektorit të Qarkullimit Rrugor të DVP Durrës kanë kryer verifikimet për automjetin dhe kanë ndëshkuar drejtuesin e tij, me masën administrative 18 000 lekë të rinj, bazuar në Kodin Rrugor.
Drejtoria Vendore e Policisë Durrës fton qytetarët të denoncojnë në numrin 112 dhe në Komisariatin Dixhital, çdo rast të shkeljes së rregullave të qarkullimit rrugor, dhe i garanton ata se do të reagojë menjëherë, konform ligjit dhe me paanshmëri”, thuhet në njoftimin e policisë.
