Dy prindër kanë kallëzuar në Prokurorinë e Tiranës, drejtoreshën e QSUT-së Albana Fico dhe drejtoreshën e Maternitetit “Mbretëresha Geraldinë” Eliona Demaliaj. Ky kallëzim ka ardhur pasi prindërve u ka ndërruar jetë foshnja vetëm nëntë ditëshe.
Babai, shtetasi A.D thotë se pas disa orësh u konstatua se fëmija kishte probleme me oksigjenimin dhe pas ekzaminimeve duhej që t’i bëhej domosdoshmërisht kontroll i zemrës. Ai shton se foshnja rezultoi me Transpozicion të enëve të mëdha të aortës së zemrës.
“Mjeku më tha që duhej bërë ndërhyrje e menjëhershme kirurgjikale koronare për zgjerimin e venave me qëllim lehtësimin e qarkullimit të oksigjenit në trupin e fëmijës.
Çdo minutë që kalonte, rrezikonte jetën e fëmijës dhe ndërhyrja ishte urgjente. Mu sugjerua se ilaçi për trajtim nuk gjendej në sektorin publik, dhe se duhej të kërkoja privatisht” thotë në kallëzim babai i foshnjës.
Prindërit kanë kallëzuar zyrtarët e institucioneve për shpërdorim detyre dhe thonë se e ndërmorën këtë iniciative në mënyrë që prindër të tjerë të mos e pësojnë kështu./ JOQ
