Drejtori i përgjithshëm i Policisë së Kosovës, Gazmend Hoxha në një intervistë për Radion Evropa e Lirë ka folur në lidhje me situatën në veri pas sulmit.
Hoxha u shpreh se nuk ka pasur një marrëveshje për ikjen e grupit terrorist nga Kosova me rastin e sulmit në Bansjekë të Zveçanit.
Hoxha tha se sulmuesit kanë arritur të ikin për shkak të terrenit të papërshtatshëm.
“Jo, asnjë marrëveshje, asnjë komunikim me qëllim të krijimit të lirimit a krijimit të korridorit për ikje apo depërtim të këtij grupi nga fshati i Banjskë, nga territori i Kosovës, nuk ka pasur. As tentativë të tillë nuk ka pasur”, tha Hoxha.
“Do të thotë, ajo çfarë ka ndodhur [është se] ne kemi komunikuar disa herë duke iu kërkuar atyre që të dorëzohen tek autoritetet e Kosovës, ata nuk kanë dëgjuar dhe vazhdimisht kanë gjuajtur disa herë, do të thotë Policia e Kosovës ka bërë tentativa për të komunikuar me qëllim që ata të dorëzohen, mirëpo kërkesat tona nuk janë pranuar dhe përgjigjja e tyre ka qenë qitjet me armë të zjarrit”.
Hoxha tha se nuk do të krijonin korridor për vrasësit e kolegut të tyre, dhe se terroristët kanë ikur për shkak të terrenit të Banjskës.
