Samiti i tretë i komunitetit politik evropian ka mbledhur sot liderët e 47 vendeve evropiane në Granada të Spanjës.
Një nga temat kryesore do të jetë zgjerimi i Bashkimit Evropian. Përveç anëtarëve të BE-së, në samit do të marrin pjesë ndër të tjera liderët e Ballkanit Perëndimor, Ukraina, Moldavia, Gjeorgjia, Turqia, Armenia, Azerbajxhani.
Presidenti i Këshillit Evropian, Charles Michel u tha gazetarëve në Bruksel se zgjerimi i BE-së do të jetë ndër temat kryesore të samitit të Komunitetit Politik Evropian, si dhe samitit jozyrtar të BE-së një ditë më vonë.
Ai tha gjithashtu se situata aktuale në Kosovë do të diskutohet në samit, duke paralajmëruar se dhuna nuk është e pranueshme dhe se mosmarrëveshjet ndërmjet Kosovës dhe Serbisë duhet të zgjidhen si kusht për integrimin në BE.
Presidentët e Serbisë dhe Kosovës, Aleksandër Vuçiç dhe Vjosa Osmani do të marrin pjesë në samitin e komunitetit politik evropian.
