Ministrja e Arsimit, Ogerta Manastirliu ka reaguar lidhur me rastin e dhunimit të mësueses, Majlinda Palushi në Lezhë e cila u godit me karrige nga një nxënës.
Manastirliu thekson se rasti është shqetësues dhe se është një ngjarje totalisht e papranueshme dhe e patolerueshme.
Po ashtu thekson se kjo ngjarje duhet të bëjë që të ketë më shumë reflektim dhe angazhim, për forcimin e mekanizmave institucionale.
“Jam shumë e shqetësuar dhe e tronditur nga ngjarja e sotme në shkollën “Hydajet Lezha” në qytetin e Lezhës, një ngjarje totalisht e papranueshme dhe e patolerueshme, ashtu siç është i papranueshëm çdo akt dhune, në mjediset tona të mësimdhënies.
I jam pranë mësuese Majlindës në këto momente dhe i uroj shërim sa më të shpejtë.
Kjo ngjarje e rëndë duhet të na bëjë të reflektojmë dhe të angazhohemi edhe më shumë për forcimin e mekanizmave institucionalë, për mbështetjen psiko-emocionale të nxënësve, komunikimin efektiv, rritjen e ndërgjegjësimit në shkollë, në familje, në komunitet, me qëllim që të garantojmë një mjedis të sigurt dhe të shëndetshëm për nxënësit dhe mësuesit tanë.
Na takon të gjithëve si shoqëri, të kontribuojmë për fuqizimin e trinomit aq shumë të rëndësishëm, mësues-nxënës-prind, për të garantuar respektin e merituar për figurën e mësuesit dhe një mjedis sa më të shëndetshëm e të sigurt në shkolla, në mënyrë që institucionet arsimore si vatrat e dijes të garantojnë arsim cilësor, dhe të edukojnë e të përgatisin brezin e ri, me vlerat më të larta të kulturës dhe qytetarisë,” shkruan Manastirliu në reagimin e saj.
“Të betohem për eshtrat e babit…”! Si nisi sherri që nxënësi qëlloi mësuesen me karrige?
