Zëdhënësja e Partisë Demokratike, Mirela Karabina ditën e sotme bëri një deklaratë shumë të fortë lidhur me ish-kryeministrin Sali Berisha, për të cilin thotë se duhet të shkojë dhe të përballet me drejtësinë dhe “jo të përdorë demokratët si mburojë, siç bën Hamasi me civilët”, duke e krahasuar me luftën.
“Sali Berisha bën mirë të shkojë të përballet me drejtësinë dhe mos të fshihet si struci.
Të shkojë të provojë së është i pafajshëm dhe mos përdorë demokratët si mburojë, njësoj siç bën Hamasi. Sali Berisha është sot person i padëshiruar në SHBA dhe Britani të Madhe.
Për hallin e tij personal ka dy vjet që së bashku me Edi Ramën, mundohet të dëmtojë PD-në, në këmbim të kullave të familjarëve të tij.
Hallet dhe makthet e non gratës nuk i zgjidh dhe as do t’i zgjidhë me mashtrim të gatuar në kazanin e përbashkët me Edi Ramën dhe të servirura në mediat e paguara me paratë e krimit dhe të korrupsionit” tha Karabina.
