Marrëveshja për emigrantët midis Italisë dhe Shqipërisë është diskutuar dhe në parlamentin italian.
Opozita ishte ajo e cila hodhi akuza të shumta, ku një nga diskutimet më pikante ishte ai i Riccardo Ricciardi-t i “Lëvizjes 5 yjet”.
“Këto dy qendra në Shqipëri do të na kushtojnë 10 herë më shumë se qendrat e ndërtuara në Itali. Shume para për çfarë? Sigurisht jo për të zgjidhur problemin e zbarkimeve të cilat me këtë qeveri kanë arritur në 150 mijë në vit falë disa mijërave që duhet të shkojnë përkohësisht në Shqipëri” – tha ai.
“Është sindroma “jo në oborrin tim” që Meloni e zgjidhi duke e zhvendosur problemin në Shqipëri. Ndoshta do të bëjnë të njëjtën gjë edhe për termocentralet bërthamore. Në fillim do të na thonë se na duhen dhe pastaj kur të shohin kundërshtimin e italianëve do t’i dërgojnë edhe ato në Shqipëri”- tha deputeti italian i opozitës.
I cili në fjalimin e tij nuk nguroi të bënte një analizë të tijën dhe drejt interesave të Edi Ramës.
“Marrëveshja nuk zgjidh absolutisht asgjë. Çështja është e qartë. Kryeministri shqiptar kishte nevojë për një sponsor drejt BE-së. Ai u shërbeu me të drejtë interesave të tij. Dhe ne po paguajmë për fushatën elektorale të Melonit kundër Salvinit. Është thjesht një tjetër reklamë” – tha Ricciardi.
