Gjoba deri në 40 mijë euro, licencim i mediave online dhe monitorim i tyre, kalimi nga funksionimi si organizata joqeveritare në kompani…
Ndryshimet e tilla, që i sjell Projektligji për Komisionin e Pavarur të Mediave (KPM) për funksionimin e mediave online, të cilat prodhojnë video, u kundërshtuan nga Asociacioni i Gazetarëve të Kosovës (AGK) dhe Këshilli i Mediave të Shkruara të Kosovës (KMSHK).
AGK-ja dhe KMSHK-ja i kërkuan Qeverisë së Kosovës që të tërhiqet nga kjo tentativë, mirëpo kjo e fundit nuk dha sinjal se do ta zbatojë këtë kërkesë.
Në mes të mospajtimeve lidhur me këtë projektligj, Radio Evropa e Lirë ju sjell përgjigje në disa prej pyetjeve kryesore për të.
Pse u ndërmorën këto ndryshime?
Zëdhënësi i Qeverisë së Kosovës, Përparim Kryeziu, i tha REL-it se ky ligj “është i mbështetur dhe buron nga direktiva e Bashkimit Evropian”.
Në Raportin e fundit të Progresit, të publikuar nga Komisioni Evropian në fund të vitit të kaluar, BE-ja rekomandoi që Kosova ta rishikojë Ligjin për Komisionin e Pavarur të Mediave, ashtu që të jetë në linjë me Direktivën evropiane për Shërbimet e Mediave Audio-Vizuale.
Si monitorohen aktualisht mediat online?
Tekstet e publikuara në mediat online aktualisht monitorohen nga KMSHK-ja. Ky trup vetërregullues nuk gjobit mediat për gabimet e tyre, por merr vendime për ankesat e bëra ndaj mediave.
Vendimet e formës “Ankesa miratohet” dhe “Ankesa miratohet pjesërisht”, pastaj, mund të përdoren për të ngritur padi civile ndaj mediave nëpër gjykatat e Kosovës.
Ndërkohë, përmbajtja audio-vizuale e publikuar në mediat online nuk monitorohet nga askush. Kryetari i KMSHK-së tha se, megjithatë, në shumicën e rasteve, videot e publikuara shoqërohen me një tekst për të njëjtën temë dhe kështu bëhet monitorimi edhe i tyre.
Direktiva e BE-së parasheh që KPM-ja t’i mbikëqyrë videot e publikuara online në të njëjtën mënyrë si monitorohen materialet e publikuara nëpër televizione dhe radio.
Ndiqni artikullin e plotë në: REL
