Ditën e sotme policia e Sarandës njofton se ka ndaluar një veprimtari të mundshme kriminale. Sipas raportimit të uniformave blu, është arrestuar në Sarandë një 34-vjeçar, E.C., banues në këtë qytet.
I riu ishte shpallur në kërkim nga Gjykata e Shkallës së Parë, Sarandë, ndaj të cilit kishte caktuar masën e sigurisë “arrest me burg”. Kjo pasi 34-vjeçari kishte rrahur me grushte rojën e një spitali në Sarandë rreth 1 vit më parë.
Gjatë kontrollit në banesën ku fshihej ky shtetas, shërbimet e Policisë gjetën 2 armë zjarri pistoleta dhe 3 krehra me municion luftarak, të cilat u sekuestruan në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
