Prokuroria e Tiranës ka zbardhur raportin për ngjarjen ku u përfshi Andri Ibrahimaj, burri i ministres Delina Ibrahimaj. Ky i fundit u zbulua se ka plagosur në nëntor të vitit 2023, drejtorin e Agjencisë së Trajtimit të Kredive, Eri Koshaj.
Sipas raportit, Andri Ibrahimaj e ka goditur atë me gozhdë në brinjë dhe në fundshpinë, në atë periudhë Eri Koshaj ishte vartësi i bashkëshortes së tij.
Gjithashtu në raport thuhet se sherri ka nisur pasi Koshaj ka sharë ministren.
“Gjatë bisedave evidentohet fakti, se grindja kishte ndodhur për shkak se Eri Koshaj i kishte sharë bashkëshorten shtetasit Andri Ibrahimaj dhe se në grindje e sipër ky i fundit e kishte goditur me gozhdë”, thuhet në raportin e siguruar nga gazetarja Klodiana Lala.
Gjithashtu edhe Andri Ibrahimaj ka pretenduar në dëshminë e tij se Eri Koshaj e ka kërcënuar dhe ofenduar me fjalë banale.
“Pas rreth 30 minutash sqaron se ka ardhur i shoqëruar me një person tjetër, trupmadh të cilin nuk e njeh dhe ishte hera e parë që e shikonte. Ka dalë nga kafja, është drejtuar për tek ata të cilët e prisnin në rrugë.
Sa ka shkuar te ky person ka filluar përsëri me ofendimet dhe ka kërkuar llogari se përse e kishte sharë dhe ofenduar, duke e tërhequr dhe kërkuar “hajde dalim nga rruga” me ofendime nga familja me fjalë banale.
Aty u konfliktuan të dy fizikisht, u goditën me njëri-tjetrin me grushta. Ai sqaron se gjatë kësaj kohe janë rrëzuar të dy përtokë dhe aty ky shtetas mund të jetë vrarë a dëmtuar në pjesë të ndryshme të trupit ku ka bërë kallëzim”, thuhet në dëshminë e tij.
