Kryeministri i Kosovës, Albin Kurti, tha të hënën në mbrëmje se është i gatshëm të hap diskutimet me partitë opozitare në vend për të shpallur zgjedhjet e reja parlamentare.
Ai i bëri këto komente pas një darke me kryetarin e Partisë Demokratike të Kosovës, Memli Krasniqi, në të cilën ishin ftuar edhe dy partitë tjera opozitare, Lidhja Demokratike dhe Aleanca për Ardhmërinë e Kosovës, por të cilat refuzuan të marrin pjesë.
“Që nga marsi i këtij viti nuk mund të themi se zgjedhjet e reja janë çështje e viteve, por e muajve. Andaj edhe unë jam i interesuar që ta diskutojë me Partinë Demokratike, Lidhjen Demokratike dhe Aleancën për Ardhmërinë e Kosovës se cila është stina më e përshtatshme për zgjedhjet e radhës. E dimë që në përgjithësi është pranvera ose vjeshta”, tha kryeministri Kurti, mandati i të cilit përfundon në fillim të vitit 2025.
“Për mua nuk është thelbësore se a do të qeveris në këtë mandat edhe 10 muaj, tetë apo gjashtë muaj apo tre muaj. Është e rëndësishme të kemi një konsensus sa më të gjerë për muajin, datën e zgjedhjeve”, theksoi ai.
Kryetari i Partisë Demokratike Memli Krasniqi, tha pas takimit se zgjedhjet e parakohshme janë shndërruar në domosdoshmëri për Kosovën, duke e kritikuar kryeministrin Kurti për qeverisje jo të mirë.
Lexoni KËTU shkrimin e plotë