Kryeministri i Kosovës, Albin Kurti, priti këtë të mërkurë në vizitën e tij të parë ambasadorin Kevin Hamilton, zëvendës Ndihmës Sekretari i Përgjithshëm për Partneritete në NATO.
Gjatë takimit u diskutua për thellimin e bashkëpunimit mes Kosovës dhe NATO-s, përfshirë fushat e mbrojtjes, teknologjisë dhe prodhimin e municionit. Kryeministri theksoi rëndësinë e sigurisë rajonale dhe rolin e institucioneve të Kosovës në ruajtjen e stabilitetit.
Një fokus i veçantë ishte prezantimi i konceptit të Xhandarmërisë së Kosovës, një strukturë e re e cila synon të forcojë sigurinë dhe koordinimin me KFOR-in dhe NATO-n, duke përmirësuar reagimin ndaj kërcënimeve dhe mbikëqyrjen në terren.
