Një i vrarë në Kosovë. Policia e Kosovës ka njoftuar se një turk është arrestuar si i dyshuar për rastin e therjes më thikë të një 26-vjeçari nga Prizreni, i cili ka vdekur të dielën në Qendrën Klinike Universitare të Kosovës, ku ka qenë duke u trajtuar si pasojë e plagëve të marra një ditë më herët.
“Lidhur me rastin është arrestuar një i dyshuar mashkull shtetas i Turqisë. Me vendim të prokurorit trupi i pajetë i viktimës është dërguar në Institutin e Mjekësisë Ligjore për autopsi, kurse i dyshuari është dërguar në mbajtje”, thuhet në raportin 24-orësh të Policisë.
Viktima të shtunën ishte gjetur i shtrirë në rrugë në lagjen “Bazhderhane” në Prizren. Sipas Policisë ai dyshohet se ishte therur dhe më pas ishte hedhur në rrugë nga një veturë.
