Për shkak të shqetësimeve për sigurinë në Lindjen e Mesme, linjat ajrore nga SHBA-ja, Evropa dhe Azia kanë pezulluar fluturimet drejt Izraelit dhe Libanit. Ky vendim është marrë pas vrasjes së Ismail Haniyeh, shefit politik të Hamasit në Teheran dhe mundësisë së hakmarrjes nga Irani.
Kompania ‘United Airlines’ ka pezulluar fluturimet midis New York dhe Izraelit deri më 6 gusht, ndërsa fluturimet nga Cyrihu në Tel Aviv janë pezulluar deri më 12 gusht. Kompani të tjera, përfshirë ato gjermane dhe italiane, gjithashtu kanë ndërprerë fluturimet drejt Bejrutit dhe Tel Avivit deri në datat përkatëse. Linjat ajrore po monitorojnë situatën për të përcaktuar rifillimin e fluturimeve.
