Presidenca e Kosovës ka reaguar për incidentin në Shkup me presidenten Vjosa Osmani, duke shprehur shqetësim për mënyrën se si është trajtuar ngjarja nga institucionet e Maqedonisë së Veriut.
Në njoftimin e saj, Presidenca thekson se Maqedonia e Veriut nuk ka marrë masa për çështjet e ngritura në notën e protestës dhe ka kontribuar në fushatën e lajmeve të rreme kundër Kosovës.
Në reagim, thuhet se Presidenca ka preferuar të ruajë marrëdhëniet mes dy vendeve dhe se incidenti ka shkelur qartë rregullat ndërkombëtare.
“Përderisa e vlerësojmë shprehjen e keqardhjes nga Kryeministri i Maqedonisë së Veriut, për fat të keq deri tani në asnjë moment institucionet e Maqedonisë së Veriut nuk i kanë trajtuar çështjet e ngritura në notën e protestës që kanë të bëjnë me shkeljen e të drejtës ndërkombëtare zakonore në raport me Republikën e Kosovës, por përkundrazi, hapur e pa asnjë hezitim e kanë pranuar një shkelje të tillë”, shkruhet mes të tjerash në reagim.
