Kretari i Grupit Parlamentar Gazment Bardhi me anë të një postimi në X ka reaguar në lidhje me deklaratat e ministres Balluku për transportin e mbetjeve toksike.
Bardhi shprehet se porti i Durrësit sipas ‘tortës Belinda’ nuk ka asnjë përgjegjësi se çfarë hyn dhe çfarë del prej tij.
Ai thotë se “me pak fjalë, me vetëdeklarim kokaina mund të shënohet si miell; helmi mund të shënohet si bimë kurative; makina mund të shënohet si biçikletë; paratë e pista mund të shënohen si letra higjenike”.
“Në fakt prej kohës Porti i Durrësit është shëndërruar në një han pa porta, që nuk kontrollohet nga autoritetet shtetërore por nga krimi i organizuar. “Torta Belinda” e di më mirë se kushdo tjetër këtë, prandaj dhe nervozizmi, sulmi ndaj medias e opozitës dhe “faji i mbetur jetim” është e vetmja rrugë që i ka mbetur”, shkruan Bardhi.
Ai thekson që afera e trafikut ndërkombëtar të mbetjeve të rrezikshme nuk mund të realizohet kurrë pa mbështetjen e autoriteteve shtetërore dhe që grupi parlamentar i Partisë Demokratike do të përdor të gjitha mekanizmat e kontrollit parlamentar për zbardhjen e plotë të kësaj çështje.
