Kryeministri Edi Rama theksoi nevojën për të ofruar kushte dinjitoze në konviktet për nxënësit e arsimit profesional, veçanërisht për ata që vijnë nga zonat rurale.
Në podkastin “Flasim”, ai theksoi se fëmijët nga familje me të ardhura më të ulta nuk mund të ndihen si të kategorisë së dytë. Rama nënvizoi investimet në shkolla, duke theksuar se ato janë shumë më të mira se shkollat private.
Edi Rama: Ka shkolla që nuk i kanë kushtet ashtu siç duhet t’i kenë dhe ne po bëjmë investim shumë të madh në një numër shkollash.
Dhe akoma më e rëndësishme dhe këtë gjë e kam diskutuar, janë konviktet. Sepse është themelore që atyre nxënësve, sidomos në zonat jashtë Tiranës, që vijnë nga zonat rurale të mos i ofrojmë më konvikte që nuk janë me kushte dinjitoze për fëmijët që duke ardhur nga zonat rurale vijnë nga familje me të ardhura më të ulta dhe nuk mund t’i lëmë të ndihen si fëmijë të kategorisë së dytë.
Por, nga ana tjetër siç ka ndodhur tek shkolla Ekonomike edhe në shkolla të tjera janë pa dallim nga shkollat private.
Janë dhe shumë më mirë se sa shkollat private. Shkollat në Tiranë, Durrës, shkollat e tjera të reja nuk ka asnjë diskutim që janë më të mira se sa shkollat private.
Edhe spitali qendëror, spitali i ri i sëmundjeve të brendshme nuk ka krahasim me asnjë spital privat në Shqipëri, as për cilësi, shërbim e ambiente.
