Kreu i Partisë Demokratike Sali Berisha ka zhvilluar një takim me të rinjtë e të rejat e FRPD. Berisha tha se këtë takim e bën të jashtëzakonshëm situata, rrethanat me të cilën janë mbledhur gjimnazistët dhe të rinjtë.
“Jeni mbledhur në atë sallë në një kohë kur një regjim, një pushtim i brendshëm ka vendosur para jush, para vëllezërve dhe motrave tuaj, bashkëmoshatarëve tuaj barrazhe dhe të mëdha, ju ka vendosur ju para një përjashtimi real social, ka errësuar me kompleksit e politikave të tij mundësitë, ëndrrën tuaj”, u shpreh Berisha.
Ai thotë se ky regjim, ka vrarë shpresën dhe ëndrrat.
“Ka vrarë ëndrrën, sepse ju, vajza dhe djem të mençur konstatoni se në vendin tuaj, në qytetin ku banoni është e pamundur të mendosh se mund të ndërtosh folenë e familjes, se mund të ndërtosh shtëpizën e projekteve tua, se mund të mendosh që me idetë, me mendimet, me studimet të ndërtosh në këtë vend një të ardhme të ndritur, një të ardhme që meriton”, tha Berisha.
