Tabloidi britanik “The Sun” ka raportuar për planet e Shqipërisë për të krijuar një mikro-shtet, i njohur si “Shteti Sovran i Urdhrit Bektashi”, që do të ketë një sipërfaqe prej vetëm 10 hektarësh, e barabartë me rreth 14 fusha futbolli. Ky projekt synon të promovojë një version të Islamit që karakterizohet nga toleranca në lidhje me veshjet dhe konsumimin e alkoolit.
Urdhri Bektashi, i cili ka selinë në Tiranë, është i njohur për mesazhin e tij të paqes dhe bashkëjetesës ndërfetare. Nëse ky projekt realizohet, Shteti Bektashi do të bëhet më i vogli në botë, duke ofruar një alternativë progresive në krahasim me shumë vende të tjera islame.
Kryeministri Edi Rama e ka mbështetur këtë iniciativë, duke e quajtur atë një “nismë të jashtëzakonshme” që shërben për forcimin e identitetit bektashi në arenën ndërkombëtare. Ai theksoi se Shqipëria ka një histori të pasur të bashkëjetesës fetare, duke shpëtuar refugjatë hebrenj gjatë Luftës së Dytë Botërore dhe duke ndihmuar afganët të shpëtojnë nga Talibanët.
Lideri i Urdhrit Bektashi, Baba Mondi, ka deklaruar se krijimi i këtij shteti nuk është i lidhur me pushtetin politik, por me forcimin e misionit të Urdhrit për moderimin shpirtëror dhe mbrojtjen e praktikave fetare. Kjo nismë do të ofronte një model të ri të tolerancës, duke lejuar pirjen e alkoolit dhe duke promovuar barazinë ndërmjet gjinive.
Si funksionojnë mikro-shtetet
Mikro-shtetet klasifikohen si shtete sovrane – që do të thotë se ato janë të vetëqeverisura – pavarësisht se pretendojnë vetëm një sasi të vogël toke ose popullsie – ose të dyja. Të tillë janë Andorra, Monako, Lihtenshtajni dhe sigurisht, qyteti i Vatikanit. Pavarësisht se janë të vogla, ato kanë të njëjtat dokumente administrative që karakterizojnë vendet më të mëdha në botë – si kufijtë dhe pasaportat. Por ata shpesh mbështeten në vendet e tjera për mbijetesë, duke qenë se kanë vetëm një ushtri të vogël dhe mungesë të burimeve të tyre.
10 shtetet më të vegjël në botë
Qyteti i Vatikanit aktualisht mban titullin si vendi më i vogël në botë. AI është 39 milionë herë më i vogël se më i madhi në botë, Rusia. Mes mikro-shteteve përfshihet edhe Monakoja e pasur. Këtu janë 10 më të vegjlit:
1. Qyteti i Vatikanit – 0,17 milje katrorë
2. Monako – 0,8 milje katrorë
3. Nauru – 8 milje katrorë
4. Tuvalu – 10 milje katrorë
5. San Marino – 24 milje katrorë
6. Lihtenshtajni – 62 milje katrorë
7. Ishujt Marshall – 70 milje katrorë
8. Saint Kitts dhe Nevis – 102 milje katrorë
9. Maldivet – 114 milje katrorë
10. Malta – 122 milje katrorë
