Izraeli ka nisur “sulme të sakta ndaj objektivave ushtarake në Iran”. Është e paqartë se cilat vende janë goditur dhe shkalla e dëmit, shkruan BBC. Shtetet e Bashkuara kanë paralajmëruar më parë Izraelin që të shmangë goditjen e vendeve bërthamore dhe të naftës që mund të shkaktojnë një konflikt të zgjeruar në rajon.
Sulmet vijnë pasi Irani lëshoi rreth 200 raketa balistike mbi Izraelin në fillim të këtij muaji. Izraeli kishte thënë se do të kundërpërgjigjet, por nuk dha detaje se kur dhe cilat vende mund të synonte. Sulmi i Iranit erdhi pas sulmeve izraelite që vranë liderin politik të Hamasit, Ismail Haniyeh, udhëheqësin e Hezbollahut, Hassan Nasrallah dhe komandantin e operacioneve të Forcave Quds të Gardës Revolucionare të Iranit, gjeneral brig Abbas Nilforoushan.
Deri më tani, media shtetërore iraniane i ka hedhur poshtë sulmet si të pasuksesshme, gjë që ekspertët i thonë BBC-së se është një përgjigje tipike nga Irani pas incidenteve të tilla. Por, ekspertët paralajmërojnë, kjo mund të ndryshojë nëse shfaqen raporte për dëme të rënda ose vdekje
Shpërthime janë raportuar edhe në Siri, megjithëse Izraeli nuk ka marrë përgjegjësinë për ato sulme. Forcat siriane të mbrojtjes ajrore përgjuan raketat dhe i rrëzuan ato, sipas agjencive të lajmeve Reuters dhe AFP, duke cituar mediat shtetërore siriane.
Sipas Pentagonit, SHBA nuk ishte e përfshirë në sulm. Shtëpia e Bardhë i quajti sulmet një “ushtrim të vetëmbrojtjes”. Presidenti i SHBA Joe Biden dhe zëvendëspresidentja Kamala Harris janë informuar mbi sulmet dhe po ndjekin zhvillimet.
