Paraditen e sotme një grup pensionistësh të iniciuar nga Lëvizja Bashkë e drejtuar nga Arlind Qori kanë protestuar sërish përpara dyerve të Kryeministrisë duke kërkuar rritje të konsiderueshme dhe jo tallje, sikur e cilësojnë ata indeksimin me 4.1%.
“Ne, përfaqësuesit e grupimit Pensionistët Bashkë, i bëjmë thirrje çdo pensionisti dhe qytetari që të bashkohet me protestën e nesërme, ditë e mërkurë, në orën 10:00 përpara kryeministrisë.
Pensionistët shqiptarë janë më të varfrit në Evropë. Nuk kemi kujdesin e duhur shëndetësor dhe na mungojnë shumë të drejta të tjera.
Ndaj i kërkojmë vendosmëri qeverisë që të plotësojë kërkesat tona bazike.
1.Miratimin e minimumit jetik si standardi i pensionit minimal dhe rritjen e të gjitha pensioneve mbi këtë bazë.
2.Përmirësim të ndjeshëm të kujdesit shëndetësor në spitale dhe në shtëpi, si dhe zgjerimin e listës së ilaçeve të rimbursueshme cilësore.
3.Ndërtimin e mjediseve publike çlodhëse, argëtuese dhe kulturore për pensionistët kudo nëpër Shqipëri.
4.Miratimin e Statusit të Minatorit për të gjithë punëtorët dhe ish-punëtorët e nëntokës.
Ne do t’i vazhdojmë protestat tona deri në plotësimin e të gjitha këtyre kërkesave bazike.
Ftojmë edhe një herë të gjithë pensionistët dhe qytetarët që t’i bashkohen protestës së nesërme!” thanë pensionistët.
