Mbrojtësi i Kombëtares së Shqipërisë, Arlind Ajeti, shprehu besimin e tij se ekipi ka potencialin për të siguruar kualifikimin në Botërorin e ardhshëm. Para ndeshjes me Çekinë, që do të luhet nesër në “Arena Kombëtare” në Tiranë, Ajeti theksoi se Shqipëria ka cilësitë e nevojshme për të arritur objektivin e vendit të parë në grupin B1 të Ligës së Kombeve.
Në një intervistë për mediat, Ajeti bëri apel për tifozët që të respektojnë himnin e Çekisë dhe të tregojnë një sjellje të denjë, pavarësisht ndodhisë së mëparshme me tifozët çekë.
“Besoj i kemi të gjitha cilësitë e duhura për të arritur kualifikimin në Botëror. Është një rrugë e gjatë, por nëse mundohemi të japim maksimumin dhe të japim shpirtin për Kombëtaren, besoj se do ta arrijmë”, tha Ajeti.
Ajeti gjithashtu u ndal te rivalët çekë, duke përmendur sulmuesin Hori, që ka pasur paraqitje të shkëlqyera dhe ka qenë një lojtar kyç për Çekinë. “Hori është shumë i rrezikshëm, është afër 2 metra i gjatë dhe është e vështirë ta ndalësh. Shpresoj që nesër t’ia dalim që të mos shënojë gol”, shtoi mbrojtësi i Kombëtares.
Kohët e fundit, Shqipëria ka treguar progres të dukshëm nën drejtimin e trajnerit, duke pasur parasysh se renditja aktuale në Ligën e Kombeve është ende e hapur dhe mund të ndryshojë nëse ekipi fiton dy ndeshjet e fundit. Ajeti nuk hezitoi të shprehte besimin te shokët e tij të skuadrës dhe te cilësitë individuale të lojtarëve. “Ne synojmë vendin e parë, të fitojmë dy ndeshjet dhe ta arrijmë këtë objektiv. Sigurisht, çdo gjë është e mundur, por me cilësinë që kemi, besoj se nuk do të biem”, përfundoi ai.
Mbështetje të madhe për Kombëtaren erdhi gjithashtu nga Ajeti edhe në lidhje me atmosferën që krijohet kur luan me ekipin kombëtar. “Ndjenja në Kombëtare është gjithmonë ndryshe, të jesh pjesë e saj është shumë e veçantë. Ata që janë aty e dinë, dhe ne gjithmonë hyjmë në fushë me një shpirt të veçantë”, shtoi Ajeti.
