Gazeta italiane “La Repubblica” ka publikuar një reportazh për iniciativën e kryeministrit shqiptar, Edi Rama, për krijimin e një shteti sovran për Urdhrin Bektashi në Tiranë. Sipas shkrimit, Rama po punon me avokatët e tij për të shpallur një “Seli të Shenjtë” për komunitetin bektashian, i cili ka një marrëdhënie të veçantë me kryeministrin dhe ka qenë historikisht i persekutuar, si nga Ataturku në Turqi, ashtu edhe nga regjimi komunist i Enver Hoxhës në Shqipëri.
Gazeta përshkruan këtë nismë si një përpjekje për të kombinuar fenë dhe demokracinë, duke krijuar një lloj “Vatikani mysliman” në një tempull në Tiranë, i cili mund të bëhet shteti më i vogël në botë. Urdhri bektashi, që ka origjinën në shekullin e 13-të, ka një traditë të theksuar për moderimin dhe bashkëjetesën fetare. Ky propozim i Ramës është mbështetur nga disa, ndërsa të tjerë e shohin si një manovër publicitare, duke e lidhur këtë me një përgjigje ndaj rritjes së ekstremizmit dhe intolerancës fetare globale.
Disa përfaqësues të komunitetit mysliman janë shprehur kundër, duke insistuar se Shqipëria duhet të mbetet një shtet laik dhe se ata janë përfaqësuesit e vetëm të Islamit në vend. Ndërsa ekspertët fetarë, si Ferdinand Samarxhi, e shohin këtë si një mundësi për të promovuar një interpretim paqësor të Islamit dhe për të ruajtur bashkëjetesën paqësore ndërfetare.
