Një 21-vjeçar shqiptar është arrestuar nga policia në Rimini të Italisë, pasi u kap në flagrancë duke fshehur kokainë për qëllime tregtimi. Hetuesit vërejtën lëvizjet e dyshimta të të riut, i cili po lëvizte në një zonë bujqësore me shkurre pranë “Via Marecchiese”. Pas një ndjekjeje, ai u pa duke hyrë në një objekt bujqësor të pashfrytëzuar, ku kishte groposur drogën.
Pasi policia e ndoqi, shqiptari u përpoq të fshihte materialin që kishte nxjerrë nga një gropë, por u kap me 110 gramë kokainë të paketuar në 8 mbështjellës. Gjatë kontrollit të mëtejshëm në vendbanimin e tij, u gjetën edhe disa gramë hashash.
I arrestuari po përballet me akuzën e posedimit dhe shitjes së drogës, ndërsa hetimet vijojnë për të zbuluar më shumë detaje të mundshme lidhur me aktivitetet e tij kriminale.
