Presidenti ukrainas Volodymyr Zelensky u bëri thirrje aleatëve të tij që t’i japin një “përgjigje të fortë” “shantazhit” të Vladimir Putin, i cili kërcënoi se do të godiste Kievin me raketën e tij të re strategjike Orechnik. Zelensky tha që duhet tu përgjigjemi dhe çdo shantazh rus duhet të përballet me një përgjigje të ashpër.
“Ne duhet t’i përgjigjemi së bashku përpjekjes së Rusisë. Ne jemi të interesuar për paqen – Ukraina dhe të gjithë partnerët tanë. Tani është koha për të forcuar pozitat tona, pozicionet e Ukrainës dhe partnerëve tanë. Çdo shantazh rus duhet të përballet me një përgjigje të ashpër. Ashtu siç e meriton Putini. Dhe ne duhet të shohim perspektivën e përfundimit të luftës me paqe të vërtetë së bashku me Amerikën, së bashku me Evropën, së bashku me të gjithë partnerët. Nevojitet paqja e vërtetë”, tha Zelensky.
Ai akuzoi Putin se dëshiron të përshkallëzojë situatën tani në mënyrë që Presidenti Trump të mos arrijë t’i japë fund luftës. Më pas u bëri thirrje qytetarëve që kur ka alarme për sulm ajror dhe kërcënime me raketa, të shkojnë në strehimore.
“Ky është një rregull i vendosur, një rregull që nuk varet nga asnjë deklaratë që vjen nga Rusia. Tani për tani, mund të ketë edhe më shumë përpjekje nga Rusia për të përhapur frikë dhe dëshpërim në Ukrainë. Ne kemi nevojë për unitet me të gjithë partnerët tanë. Putini tani po bën atë që bën gjithmonë, duke frikësuar, duke përçarë dhe duke u përpjekur të thyejë ose destabilizojë secilin prej nesh individualisht. Ai nuk mund të bëjë asgjë tjetër. Ai humbet kur është i izoluar. Dhe ai duhet të humbasë tani. Në çdo gjë”, tha Zelensky.
