Prokuroria e Posaçme Kundër Korrupsionit dhe Krimit të Organizuar (SPAK) ka reaguar për akuzat e Partisë së Lirisë pas ndalimit të takimit midis eurodeputetit Fredi Beleri dhe kryetarit të PBDNJ, Vangjel Dule, me ish-presidentin Ilir Meta në burgun 313 në Tiranë.
Sipas SPAK, vizitat e deputetëve në institucionet penale nuk kërkojnë autorizim nga Prokuroria, sipas ligjit nr. 81/2020, por janë në kompetencën e Drejtorisë së Përgjithshme të Burgjeve.
SPAK gjithashtu njoftoi se nuk kishte asnjë kërkesë formale nga Dule dhe Beleri për të takuar ndonjë të paraburgosur deri në orën 15:15 të datës 31 janar 2025.
Reagimi i plotë i SPAK:
Në bazë të nenit 51 të ligjit nr.81 të vitit 2020 “Për të Drejtat dhe Trajtimin e të Dënuarve me Burgim dhe të Paraburgosurve”, institucionet e ekzekutimit të vendimeve penale mund të vizitohen nga deputetë, pa autorizimin paraprak të Prokurorit.
Në këtë rast, miratimi jepet nga Drejtoria e Përgjithshme e Burgjeve.
Deri në orën 15:15 të dt.31.01.2025, në protokollin e Prokurorisë së Posaçme Kundër Korrupsionit dhe Krimit të Organizuar nuk ka mbërritur asnjë kërkesë nga shtetasit Alfred Beleri dhe Vangjel Dule për të takuar ndonjë të paraburgosur.
