Ushtria dhe Policia e Kosovës kanë parakaluar në Prishtinë në 17-vjetorin e Pavarësisë. Mijëra qytetarë kanë shikuar maratonën ushtarake dhe policore, me pajisje dhe automjete luftarake. Vjosa Osmani tha se populli i Kosovës ka luftuar dhe sakrifikuar për Pavarësi.
Osmani në fjalimin e saj ka përmendur ish-presidentin Ibrahim Rugova si dhe sakrificën e familjes së komandantit legjendar të UÇK-së, Adem Jashari e të gjithë ushtarëve të UÇK-së. Gjithashtu ka falënderuar edhe miqtë e Kosovës.
“Ne nuk harrojmë ndihmën e tyre sepse Kosova ka miq dhe miqtë e Kosovës janë miqtë e lirisë”, është shprehur Osmani. Ajo ka thënë se ushtria e Kosovës do të jetë gjithnjë në mbrojtje te paqes dhe sovranitetit.
“Kosova megjithatë nuk është vetëm një copë tokë Kosova është frymë shpirt dhe mision i përhershëm … Kushdo që guxon ta vërë në dyshim këtë realitet le ta dëgjoj zërin e popullit sot. Sot ne të gjithë populli i Kosovës jemi bashkë, populli i Kosovës feston si një, me dhe krenari, pavarësisht dallimeve, sfidave … ne mbesim të bashkuar për atdheun tonë, për Republikën tonë të dashur”, është shprehur Osmani.
