Prokuroria e Kosovë ka ngritur aktakuzë kundër dy të pandehurve me iniciale B.Sh., dhe M.Q., nën dyshimin se kanë kryer veprën penale të spiunazhit.
I pandehuri M.Q. është përmendur edhe për dyshimet për kryerje të veprës penale “mbajtje në pronësi, kontroll, ose posedim i paautorizuar i armëve”.
Të pandehurit janë arrestuar në qershor të vitit të kaluar në qytetin e Ferizajt, ndërsa mediat lokale në Kosovë patën raportuar se ata dyshohet se kanë spiunuar për Agjencinë serbe të Sigurisë dhe Informacionit (BIA). Vetë BIA pati reaguar duke mohuar secilën lidhje me personat e arrestuar.
Prokurori i rastit ka kërkuar nga gjykata që të pandehurve t’iu vazhdohet masa e paraburgimit deri në përfundimin e shqyrtimit gjyqësor, dhe që ata t’i shpallë fajtorë dhe t’i dënojë.
