Një koronavirus i ri është zbuluar në Kinë dhe e veçanta e tij është frikësuese. Ashtu si Sars Cov 2, edhe ai mund të transmetohet lehtësisht nga lakuriqët e natës te njeriu sepse përdor të njëjtin receptor, enzimën ACE2 sqarojnë ekspertët.
Virusi i njohur si HKU5-CoV-2, është një prejardhje e re e koronavirusit HKU5 e zbuluar në lakuriqët e natës japonezë në Hong Kong.
Testet laboratorike zbuluan se virusi mund të infektojë qelizat njerëzore dhe indet e mushkërive dhe të zorrëve të rritura artificialisht. Ai gjithashtu mund të lidhet me receptorët ACE2 te njerëzit, lakuriqët e natës dhe kafshët e tjera, duke rritur gjasat e transmetimit midis specieve.
Edhe pse HKU5-CoV-2 ka një aftësi lidhëse më të fortë se lloji i tij origjinal me një gamë më të gjerë të pritësve, studiuesit theksuan se ai është shumë më pak i fuqishëm se SARS-CoV-2, virusi përgjegjës për COVID-19, dhe rreziku i transmetimit të gjerë njerëzor është i ulët.
