Gjashtë punonjëse të kompanisë “Rossmann & Lala” përfunduan në spital me probleme respiratore, pasi dyshohet se u asfiksuan në magazinën e paketimit në autostradën Tiranë-Durrës.
Ngjarja ndodhi më 11 mars, kur punonjëset ndjenë një aromë të rëndë pas hapjes së derës dhe më pas shfaqën probleme me frymëmarrjen. Ato u dërguan në spital dhe, pas trajtimit, u liruan për në banesë. Dëshmitë e tyre tregojnë se një aromë e tillë ka qenë e ndjerë edhe disa muaj më parë.
Policia ka nisur hetimet për të verifikuar nëse magazina përmbushte standardet e sigurisë dhe nëse punonjëset ishin ekspozuar ndaj gazrave apo kimikateve të dëmshme. Materialet procedurale janë dërguar në Prokurori për vlerësim të mëtejshëm.
