Ministri për Europën dhe Punët e Jashtme të Shqipërisë, Ferit Hoxha, përmes faqes së ministrisë, me anë të një postimi në facebook ka njoftuar për takimin që ka mbajtur këtë të mërkurë me të dërguarën e Posaçme të Republikës Çeke për Ballkanin Perëndimor, Edita Hrdá, duke theksuar rëndësinë e procesit të zgjerimit të BE në rajon si një investim strategjik për paqen dhe stabilitetin.
Postimi i Hoxhës
Shkëmbim i shkëlqyer mendimesh me Ambasadoren Edita Hrdá, mike dhe ish-kolege në OKB / New York dhe në Bruksel, aktualisht e Dërguara e Posaçme e Republikës Çeke për Balkanin Perëndimor.
Rikonfirmuam angazhimin tonë të përbashkët për zgjerimin e Bashkimit Europian si një investim strategjik për paqen, stabilitetin dhe prosperitetin në rajon.
Shqipëria mbetet e palëkundur në rrugën e saj drejt anëtarësimit, me përparim të prekshëm dhe një ritëm të fortë reformash.
Vlerësojmë mbështetjen e vazhdueshme të Republikës Çeke për një proces zgjerimi të besueshëm dhe të bazuar në meritë, si dhe për mbajtjen e Balkanit Perëndimor në fokus të agjendës së Bashkimit Europian.
