Forcat e armatosura izraelite urdhëruan civilët në Rripin e Gazës që të evakuojnë urgjentisht zonat kufitare, pas një nate të bombardimeve të forta të enklavës, e cila la të paktën 404 të vdekur.
Urdhri “në mënyrë specifike” ka të bëjë me zona të tilla si komunitetet e Beit Hanoun (në veri), Khirbet Khuzaa, Abbasan al-Khabira dhe Abbasan al-Jadida (në jug), të cilat u përcaktuan “zona të rrezikshme luftarake” përmes X nga zëdhënësi i ushtrisë izraelite, Avihai Andrai. Oficeri u bëri thirrje civilëve që “të lëvizin në pjesën perëndimore të qytetit të Gazës dhe në qytetin e Khan Younis”.
Më herët, ministri izraelit i Mbrojtjes, Yisrael Katz, tha se sulmi në Gaza do të vazhdojë derisa “të gjithë” pengjet, të gjallë dhe të vdekur, të kthehen pas sulmeve ajrore shkatërruese të natës në enklavë.
Kjo ndodh pavarësisht se një zyrtar kryesor i Hamasit deklaroi se lëvizja po “punon” në koordinim “me ndërmjetësit” në negociatat indirekte për të “ndaluar” sulmin e Izraelit.
Një zëdhënës i presidentit amerikan tha për Fox News se qeveria izraelite ishte konsultuar me Presidentin Donald Trump përpara bombardimeve të sotme.
Në të njëjtën kohë, qeveria e kontrolluar nga Hamas në Gaza njoftoi se përveç ministrit të Brendshëm Mahmud Abu Wafa, kreu i Mbrojtësve Publikë, Issam al-Dhaliyas, Ministri i Drejtësisë Ahmed al-Hatta dhe drejtori i përgjithshëm i shërbimeve të sigurisë së brendshme, Bahjat Abu Sultan, u vranë në sulmet izraelite.
