Komedianët e famshëm rusë, “Vovan & Lexus” kanë publikuar të martën një video me kryeministrin Albin Kurti, për të cilin thonë se ka rënë pre e mashtrimit të tyre. Sipas shkrimit të publikuar, komedianët i janë prezantuar Kurtit si president letonez.
Në videon e publikuar në kanalin e komedianëve, Kurti shihet teksa flet në anglisht në atë që duket si bisedë online direkte.
Në video, Kurti dëgjohet teksa ankohet se ndaj tij ka pasur luftë hibride. Këtu ka thënë se lufta e tillë është bërë kryesisht nga Serbia, Rusia “por edhe elementë të tyre brenda Kosovës”. Sipas tij, lufta e parë ndaj tij është bërë përmes dezinformatave.
Pikë të dytë i ka përmendur “premtimet irracionale nga opozita, që po flirtonte me luftën hibride”. Në pikë të tretë të “luftës hibride ndaj tij”, Kurti ka përmendur oligarkë.
Kurti ka kritikuar edhe Richard Grenellin, ish-emisarin amerikan për dialogun, Kosovë-Serbi. Sipas kryeministrit Kurti, Grenelli ka punuar katër vjet kundër tij.
“Ai ka qenë edhe instrument në rrëzimin e Qeverisë sime herën e kaluar”, ka thënë Kurti teksa ka shtuar se Grenelli ka dekoratë në Serbi. “Nuk është mirë që të marrësh një të tillë nga një shtet autoritar dhe të pretendosh se je neutral”.
Në video ai ka treguar edhe për furnizimet e ushtrisë e fabrikën e municioneve. Nuk dihet kur është incizuar kjo video. Presidenti i Letonisë, Edgar Rinkevics më 20 mars qëndroi në Kosovë.
Dy komedianët rusë njihen për mashtrime përmes thirrjeve telefonike të njerëzve me ndikim. Kanë mashtruar me sukses edhe Hillary Clintonin, Boris Johnsonin e Kamala Harrisin.
Nuk është hera e parë që liderë të Kosovës bien pre e mashtrimit të tyre. Ngjashëm kishte ndodhur më 2019 me kryeministrin e asaj kohe, Ramush Haradinaj. Qeveria nuk është përgjigjur në pyetjet e deritashme të KOHËS. Sapo të ketë përgjigje, artikulli do të përditësohet.
