IdentiTek, kompania shtetërore e prodhimit të dokumenteve biometrike, ka lançuar një shërbim të ri që i mundëson qytetarëve shqiptarë të pajisen me letërnjoftim elektronik brenda vetëm 3 ditësh, duke ulur ndjeshëm kohën e aplikimit nga 14 ditë. Ky shërbim mund të merret për një pagesë prej 3 mijë lekësh.
Ky shërbim është veçanërisht i dobishëm për qytetarët që kanë nevojë urgjente për dokumentin e identifikimit, si emigrantët që qëndrojnë për pak kohë në Shqipëri, apo ata që kanë nevojë për kartën e identitetit për arsye personale, profesionale apo administrative.
Aplikimi mund të kryhet në çdo zyrë IdentiTek në të gjithë Shqipërinë, dhe procedura është e thjeshtë:
Blerja e kuponit për procedurën e përshpejtuar.
Shtimi i dokumentit të vjetër ose vetëdeklarimin për humbjen/vjedhjen nga e-Albania.
Bërja e aplikimit në një nga zyrat e IdentiTek.
Tërheqja e kartës së re në të njëjtën zyrë.
Ky shërbim është i aksesueshëm për të gjithë qytetarët, përfshirë ata që pajisen për herë të parë me letërnjoftim elektronik, ata që rinovojnë dokumentin e skaduar, si dhe ata që kërkojnë zëvendësim për shkak të humbjes, dëmtimit, apo skadimit të tij.
