Ish-kryetari i bashkisë Shkodër, Bardh Spahia është paraqitur në gjykatë mëngjesin e kësaj të mërkure. Bardh Spahia është marrë i pandehur nga SPAK dhe akuzohet për “Pengime për ekzekutimin e vendimeve të gjykatës”, parashikuar nga neni 320 i Kodit Penal.
Në shkurt Prokuroria e Posaçme Kundër Korrupsionit dhe Krimit të Organizuar, SPAK njoftoi përfundim e hetimeve paraprake ndaj ish-kryetarit të Bashkisë Shkodër, Bardh Spahia, i akuzuar për veprën penale të pengimit të ekzekutimit të vendimeve të gjykatës. Po ashtu, SPAK i kërkon gjykatës kalimin e çështjes për gjykim.
Spahia në cilësinë e kryetarit të Asamblesë së Përgjithshme të Ujësjellës Kanalizimeve Shkodër, ka marrë dy vendime në korrik të vitit 2022, për të liruar nga detyra administratorin e Ujësjellës Kanalizimeve, Mark Molla dhe ka emëruar në këtë detyrë A.B.
I larguari nga detyra ka ushtruar padi në gjykatë, që e ka pranuar kërkesën e tij dhe po ashtu ka vendosur pezullimin e dy akteve të nxjerra nga Spahia për emërimin e administratorit të ri, deri në marrjen e vendimit të formës së prerë nga gjykata lidhur me këtë çështje.
Sipas SPAK, ish-kryebashkiaku Spahia, megjithëse ka qenë në dijeni të vendimit të gjykatës që ishte i qartë dhe i ekzekutueshëm në mënyrë të menjëhershme, e ka anashkaluar këtë urdhërim gjyqësor, sipas SPAK-ut.
