Sekretari i përgjithshëm i NATO-s, Mark Rutte u shpreh sot se “konsensusi nga diskutimet e dy ditëve të fundit është se bota po bëhet më e rrezikshme, dhe ne kemi nevojë për NATO-n më shumë se kurrë”. Ai iu është referuar dy ditëve të takimeve të ministrave të jashtëm të NATO-s që u mbajtën në Bruksel.
Ai ka shtuar se NATO “përballet me kërcënime reale për sigurinë tonë, më direkti nga Rusia, por edhe nga të tjerë”.
Rutte është pyetur për tarifat e SHBA-së duke iu përmendur Neni 2 i traktatit të NATO-s që thotë se të gjithë aleatët duhet të eliminojnë konfliktin në politikat ekonomike dhe inkurajon bashkëpunimin ekonomik mes tyre. Ai është përgjigjur se roli i tij është të fokusohet në mbrojtjen e territorit të NATO-s.
Edhe pse disa herë është munduar t’i shmangë pyetjet lidhur me tarifat e SHBA-së, Rutte ka shtuar se mendon se masat e SHBA-së nuk shkelin Nenin 2.
Ai po ashtu ka shmangur edhe pyetjet lidhur me Grenlandën dhe interesin e presidentit amerikan për ta kontrolluar.
