Zbardhen detaje të reja nga ngjarja tragjike në Itali ku ish-i dashuri filipinas vrau studenten shqiptare në Romë. “Po i dërgoja mëngjesin në shtrat.
Pashë një mesazh që i erdhi nga një djalë tjetër në celular. Mora thikën që ishte në tabaka dhe e vrava. Nuk e kisha paramenduar” ka deklaruar 23-vjeçari Mark Antony Samson në lidhje me vrasjen e ish të dashurës së tij shqiptare, Ilaria Sula.
Sula u vra mëngjesin e 26 Marsit pasi kaloi natën në shtëpinë e tij. Samson tha se 22-vjeçarja i kishte shkuar në shtëpi për t’i kthyer disa rroba. Por i riu thotë se ajo vendosi të qëndronte aty pasi donte të shmangte transportin publik.
“E sulmova nga pas, duke e goditur në qafë”, tha ai, duke mohuar se vrasja ishte e paramenduar dhe duke hedhur idenë se gjithçka ka ndodhur për shkaqe xhelozie.
Samson ka deklaruar se gjithçka e ka bërë vetëm dhe ka zgjedhur të heshtë kur është pyetur rreth pranisë së prindërve në shtëpi. I riu ka treguar më pas se e ka futur trupin në një valixhe dhe e ka hedhur në një greminë.
