Presidenti i Republikës së Shqipërisë, Bajram Begaj, ka reaguar menjëherë pas fitores së Nicușor Dan në raundin e dytë të zgjedhjeve presidenciale në Rumani, të mbajtura më 18 maj 2025. Nicușor Dan, i cili ka qenë kryetar i Bashkisë së Bukureshtit, arriti të mposht rivalin e tij George Simion dhe të siguronte mandatin e tij të parë si president i Rumanisë.
Në një mesazh urimi nëpërmjet rrjeteve sociale, Presidenti Begaj theksoi lidhjet e ngushta mes Shqipërisë dhe Rumanisë dhe shprehu gatishmërinë për të thelluar më tej bashkëpunimin mes dy vendeve.
“Urime @NicusorDanRO për zgjedhjen tuaj si President i Rumanisë. Shqipëria dhe Rumania gëzojnë marrëdhënie shumë të mira dhe miqësore. Pres me kënaqësi të punojmë së bashku për forcimin e mëtejshëm të tyre në dobi të popujve tanë miq,” shkruan Presidenti Begaj në profilin e tij zyrtar në rrjetet sociale.
