Kryetari i Partisë Demokratike, Sali Berisha, mori pjesë në Asamblenë Parlamentare të OSBE-së në Porto të Portugalisë, ku theksoi dramën e shpopullimit të Shqipërisë dhe ndikimin shkatërrues të narkodiktaturës në ekonominë e vendit.
Berisha deklaroi se gjatë periudhës 2014–2024, Shqipëria ka humbur më shumë njerëz se çdo vend tjetër në rajon dhe më gjerë, me rreth 45% të popullsisë që ka emigruar, sipas të dhënave të Eurostat dhe organizatave ndërkombëtare.
Ai përmendi rënien drastike të lindshmërisë si pasojë e këtij emigracioni masiv.
Në fjalën e tij, Berisha akuzoi qeverinë për ekonominë e mbështetur në narkotrafik dhe korrupsion, duke e quajtur Shqipërinë “narkodiktaturën e parë dhe të vetme në Europë”.
Ai theksoi rënien e prodhimit industrial dhe bujqësor, si dhe përfshirjen e karteleve të drogës në sektorin e ndërtimit, duke e cilësuar këtë si një “narkorritje” ekonomike.
Berisha paralajmëroi se këto fenomene po shkatërrojnë kombëtarisht vendin dhe kërkoi ndërgjegjësim dhe veprime urgjente për përballimin e këtyre sfidave.
