Ivanka Trump ka ndarë së fundmi në rrjetet sociale momente nga udhëtimi i saj në Shqipëri, ku është shfaqur së bashku me bashkëshortin Jared Kushner dhe fëmijët, duke shijuar një drekë buzë detit me pamje nga ishulli i Sazanit.
Vizita vjen në kuadër të një projekti ambicioz, pasi Kushner, i shpallur investitor strategjik nga qeveria shqiptare, synon të ndërtojë një resort luksoz në ishullin e Sazanit me një vlerë prej 1.4 miliardë dollarësh. Projekti parashikohet të realizohet në bashkëpunim me shtetin shqiptar.
Në këtë drejtim, është themeluar shoqëria shtetërore “Albanian State Development & Real Estate”, që do të përfaqësojë interesat e qeverisë në këtë investim dhe në projekte të tjera strategjike në të ardhmen.
