Ka përfunduar me sukses operacioni policor i koduar “Identiteti” pasi u zbulua një ambient i përshtatur si laborator për falsifikimin e dokumenteve me qëllim kalim të paligjshëm të kufirit.
65-vjeçari Ylli Brahimaj u arrestua dhe është në masën e sigurisë “arrest në shtëpi”, të dhënë nga SPAK si dhe djali i tij Pjerin Brahimaj 45 vjeç. Ndërsa është proceduar penalisht 62-vjeçari me iniciale Sh.L., i cili dyshohet si bashkëpunëtor i dy të arrestuarve.
Gjatë kontrollit në banesë u gjet një ambient i fshehtë i kthyer në laborator për prodhimin dhe falsifikimin e dokumenteve të ndryshme dhe pasaportave.
Nga hetimet ka rezultuar se prodhimi i një pasaporte të falsifikuar me shtetësi të huaj arrinte në vlerat nga 15 000 deri në 20 000 euro. Këto pasaporta dyshohet se përdoreshin për kalimin e paligjshëm drejt vendeve të Bashkimit Evropian ose SHBA.
Ndërkohë po punohet për identifikimin e personave të tjerë të përfshirë në këtë aktivitet. Ndërsa materialet procedurale iu referuan Prokurorisë së Tiranës, për veprime të mëtejshme.
