Autoritetet turke kanë arrestuar tre kryetarë bashkish nga Partia Popullore Republikane (CHP), partia kryesore opozitare në vend, nën dyshimet për përfshirje në korrupsion.
Në mesin e të ndaluarve janë kryebashkiaku i Adanës, Zeydan Karalar, ai i Adiyamanit, Abdurrahman Tutdere, si dhe kryebashkiaku i Antalias, Muhittin Böcek.
Hetimet janë zhvilluar nga Prokuroritë e Përgjithshme të Stambollit dhe Antalias dhe kanë çuar gjithashtu në arrestimin e tetë personave të tjerë.
Kjo përbën valën e dytë të arrestimeve të zyrtarëve të CHP-së, pas ndalimit të kryebashkiakut të Stambollit, Ekrem Imamoglu, në mars.
CHP ka mohuar akuzat dhe i ka cilësuar hetimet si të motivuara politikisht.
